Certified Imba si Aquino

Sabi ng tropa kong si Julieto Pellazar na adik sa larong  "defence of the ancients" o mas kilala sa tawag na DOTA, ang ibig sabihin daw ng imba ay imbalanced. Ginagamit raw nila ito sa mga kalaro nilang halimaw sa paglalaro ng DOTA o hindi kaya ay sa mga hindi ganoon kagaling. Ang imbalanced raw  sa DOTA ay maaaring matamo kung mauungusan mo ang iyong mga kalaban o hindi kaya ay ikaw ang mauungusan. Simple, basta hindi balansyado ang laro. Pero hindi lang sa DOTA ginagamit ang imba dahil sa kahit anong online games, mapa-RPG man o simpleng virtual game ay ginagamit na din ito.

Ni-research ko sa internet ang tunay nitong ibig sabihin at nagbasa rin ako ng mga online surveys, blog posts at mga facebook accounts tungkol dito at tama naman ang pagpapakahulugan ng tropa ko. Ayon sa answers.com, imba is an abbreviation of the word "imbalanced" or someone or something that causes an imbalance. It could describe someone who is very skilled in playing DOTA or an idiot who sucks at the game.

At dahil nga sa uso na ang salitang ito, madalas na rin nating naririnig sa mga kabataan ang ganitong salita. Kahit sa usapan ng mga magbabarkadang lasing bukang bibig na rin nila ito: "pare, imba ka kahapon, ang lupit mo" o di kaya ay "dude, imba syota mo, palitan mo na lang". Laganap na rin ito hindi lamang sa online community ngunit maging sa kalye. Nagiging laganap na ito parang sa paglaganap ng salitang jejemon dati.

At sa pagkakataong ito, gusto kong paabutin hindi na lamang sa kalye ang salitang imba ngunit maging sa Malacanang. Dahil para sa mga kabataan maging sa kalakhan ng mamamayan, certified imba (negative) talaga si Pangulong Aquino.

Imba si Noynoy dahil:

• Una, hindi nagawang panagutin o usigin man lang ni Aquino si Arroyo at iba pang naging sangkot sa malawakang korapsyon at paglabag sa karapatang pantao. Ipinagmalaki pa ni PNoy ang binuo niyang Truth Commission e wala naman itong naisampang kaso para kay Arroyo. Sa katunayan ay pinabagal lang nito ang proseso ng pag-uusig sa mga salarin. Marahil ay nagawa nga ni Aquino na i-intimidate (intimidation lang talaga) ang ibang tax-evaders, mga patabaing baboy sa nakaraang adminstrasyon na tumatanggap ng sobrang laking sahod at mga luho mula sa kaban ng bayan pero walang kwenta si Aquino para sa pag-uusig sa pinakapasimuno ng mga anomalyang ito--si GMA.
  

• Pangalawa, sa loob ng isang daang araw ni Aquino sa pwesto ay walang nakuhang hustisya ang mga biktima ng extra-judicial killings at enforced disapparances. Sa unang mga  linggo pa lang ng kanyang pag-upo ay tatlo na ang pinaslang na aktibista at sa ngayon ay may kabuuan ng 16 aktibista ang pinapaslang. Sa katunayan ay nagpapatuloy pa ang insidente ng panghaharas, iligal na pang-aaresto at torture sa mga kritiko ng gobyerno. At ang nakakalungkot pa rito ay wala pang umuusad na kaso sa pinakamasahol na human rights violator na si Arroyo. Nandyan din ang isyu ng Morong 43 na magpasahanggang ngayon ay nakapiit pa rin Camp Bagong Diwa. At sa kabila ng lahat ng paglabag sa karapatang-pantao ay nagawa pang i-extend ng gobyerno ang madugong programa kontra-insurhensiya ni GMA na Oplan bantay laya (Operation freedom watch).

• Pangatlo, kaiba sa ipinangako ni Aquino ay hindi pa rin nasusolusyunan ang makasaysayang laban ng mga magsasaka ng Hacienda Luisita. Hanggang sa ngayon ay nasa kontrol pa rin ng angkan ng mga Cojuangco ang buong lupain at patuloy pa ring busabos ang mga magsasaka sa kanilang sariling lupa. Sa pangkalahatan ay wala ring esensyal na reporma sa lupa na nagawa si Aquino. Sa katunayan pa nga niyan ay hindi niya rin pinakinggan ang agenda ng mga magsasaka dahil sa pangatlong araw pa lang ng kampuhang magssaka mula sa iba't ibang mga rehiyon ay marahas na itong bunuwag sa Mendiola. Nanatili pa rin magpasahanggang ngayon ang sistemang hasyenda na nagpapahirap sa ating mga magsasaka tulad ng sa Hacienda Yulo sa Calamba, Hacienda Looc, Roxas, Puyat, Agoncillo at Zobel sa Batangas, Hacienda Fule sa Laguna at marami pang iba. At masahol pa dito, sa kanyang ulat sa bayan para sa unang isang daang araw niya sa Palasyo ay wala rin siyang tinalakay hinggil dito.

• Pang-apat, ipinagpapatuloy pa rin ni Aquino ang mga bigong patakarang neo-liberal ng mga nagdaang gobyerno.  Tulad ng kanyang sinundan, nakasandig pa rin si Aquino sa mga foreign investments, foreign loans at OFW remittances para isalba ang naghihingalong ekonomiya. Wala rin siyang plano para magpatupad ng mga tunay na reporma sa lupa, pambansang industriyalisasyon na pundamental para sa pambansang pag-unlad.Sa katunayan ay pinangangalandakan ng gobyernong Aquino ang Public-Private Partnership program nito.

• Pang-lima, pinaliit din ni Aquino ang badyet para sa serbisyo-sosyal tulad ng edukasyon at kalusugan habang ipinagmamalaki ang programang “conditional-cash transfer” para tugunan di-umano ang kahirapan ng mamamayan. Sa kabila nito ay nakaamba rin ang pagtataas ng pasahe sa LRT/MRT at presyo ng iba pang pangunahing bilihin. Nandyan rin ang pagpapatupad sa susunod na taon ng dagdag na dalawang taon  (K+12) para sa basic education.

•  Pang-anim, nagpapatuloy pa rin sa pagpapatuta ang gobyernong ito sa gobyernong Amerika. Kaiba sa naipangako ni Aquino ay wala pang nagiging hakbang ang gobyerno para sa pagrerebyu ng Visiting Forces Agreement. Sa katunayan ay sinuportahan pa ni Aquino ang US war on terror at ang panghihimasok ng Amerika sa Southeast Asia. Hindi rin ito naninindigan sa pagpapalayas sa mga tropang militar ng Amerika sa Mindanao na nagreresulta lamang ng karahasan lalo na sa mga kababaihan at bata.

Ito ang ilan sa mga dahilan kung bakit  "imba" nga talaga si Aquino. Imba siya para sa mga mamamayan. At tulad nga ng sinabi ni Renato reyes Jr, secretary general ng Bagong Alyansang Mabayan, ang pag-unlad na ipinagmalaki ni Noynoy sa kanyang ulat sa bayan noong ika-7 ng Oktubre ay malayo sa bituka ng mamamayang nakakaranas ng matinding kagutuman at kahirapan. Kumbaga, wapakels ang mga tao sa mga pag-unlad na natamo kuno ng gobyernong ito sa unang isang daang araw ni Aquino dahil ang kailangan nila ay LUPA, SAHOD, TRABAHO, EDUKASYON AT SERBISYO-SOSYAL. Ito ang esensyal para sa mamamayan.

Kaya para sa amin, certified imba ka talaga Aquino!