Ang makasaysayang kabulukan ng ROTC

"Masama sila. Wala silang respeto kahit sa kababaihan. Pagagawin nila lahat kahit hindi mo na kaya at hindi na makatao. Pasusuotin ka sa kanal, paakyatin kung saan saan, paduduraan. Pagkatapos ng lahat ng paghihirap mo para tapusin ang kursong ito, didibdiban ka pa-- kahit babae ka pa"

Ito ang mga pahayag na aking natandaan ng minsang may nakakwentuhan akong dating ROTC cadet. Babae siya pero matatag at palaban. Kwinento nya sa akin ito ng parang 'di man lang natatakot. Pero isa lang ang nais nyang ipahayag... at ito ay ang pagkasuklam nya sa institusyong kinabilangan niya. Mismong ako, nabibigla sa mga kwinikwento nya. Gabi kung sila ay magdaos ng mga aktibiti at labis na pambabastos ang nararanasan nya sa mga officer nila. Sa pagkakalarawan niya sa akin, parang hayop ang turing niya sa mga opisyal na dating hinangaan niya. Umayaw na siya.

Mainit init ang isyu ngayon ng panukala ng Armed Forces of the Philippines (AFP) upang ipatupad muli ang mandatory ROTC sa kolehiyo. Ito raw ay upang mapunan ang kakulangan ng mga reserbang pwersa ng militar na kailangan sa oras ng kalamidad at sa oras na kailangan ng bansa na manananggol. Nais daw ng AFP na muling ibalik sa kurikulum ang sapilitang pagpapasali sa mga estudyante sa kolehiyo sa ROTC lalong lalo na sa mga kalalakihan.

Iba't iba ang reaksyon ng mga tao. Ang iba ay gusto ito basta raw ayusin lang ang sistema. Pero karamihan, ayon na rin sa online polls dito at iba pang mga balita ay mariin itong tinututulan. Dagdag gastos lang daw ito at nakakatamad. May ilan din tulad ni Anthony Taberna na walang kwenta ang posisyon. Yung tipong @#%^*!$ ang reaksyon. Sabi niya kasi sa punto por punto kung saan nagharap si DND Sec. Voltaire Gazmin at NUSP chair Einstein Recedes, panahon na raw para ibalik sa kabataan ang nasyunalismo at disiplina sa pamamagitan ng ROTC. Na dapat handa raw ang kabataan sa paglilingkod sa bayan sa panahon ng may kalamidad at pananakop  sa ating bansa gaya na lang din daw ng linya sa Lupang Hinirang na: sa manlulupig, di ka pasisiil".  Itinuturing pa nga ni Anthony na ibang usapin (as in hiwalay) ang isyu ng Student Intelligence Network sa isyu ng ROTC. Ito kasi ang isa sa mga inihapag na dahilan ni Einstein kung bakit sila tumututol sa mandatory ROTC. Sa napanood kong iyon, naisip ko, ganon ba kainosente si Anthony Taberna kung gaano kadumi ang ROTC? Ganoon ba siya naniniwala kay Sec. Gazmin na magiging maganda na ngayon ang kalakaran sa ROTC dahil sa aayusin na rin daw ng AFP ang paghawak nito. Paano na yung rekord ng mga militar? Paano na ang mga estudyanteng naging biktima ng malupit nitong kalakaran tulad ni Mark Chua? Paano na ang isyu ng korapsyon sa loob mismo ng ROTC? Magkalimutan na lang? Ang pagtutol ng kabataan para sa panukalang ito ay 'di lamang dahil sa emosyonal na batayan. Ito ay dulot na rin ng makasaysayang kabulukan ng sistema sa loob institusyong ito!

Taong 2001 nang ipinasa ang batas na nililikha ang ROTC bilang isa na lamang opsyon para sa mga estudyante sa kolehiyo. Ito ay bilang tugon na rin sa insidente ng pamamaslang kay Mark Chua. Si Mark Chua ay estudyante ng University of Sto. Tomas (UST) na ibinulgar ang korapsyon sa loob ng ROTC at inilathala ito sa The Varsitarian --ang pinakasikat na publikasyon ng UST. Ang pambubulgar na ito ay nagdulot ng pagkasibak ng mga militar na opisyal ng ROTC sa unibersidad. Matapos ng insidente ng pagkakasibak ng mga opisyal ay nakatanggap na si Chua ng mga death threat sa mga 'di kilalang tao. At ilang araw matapos nito ay natagpuan na ang bangkay ni Chua.

Ang korapsyon at malupit na oryentasyon sa ROTC na ibinulgar ni Chua ay hindi naging biro at talagang ikinagalit at ikinatakot  ng mga estudyante. Ibinulgar nya ang sistema ng palakasan sa loob, ang talamak na paniningil ng kung ano ano upang punan ang iyong mga pagkukulang tulad ng mga absences at uniform, nandyan din ang isyu ng diskriminasyon sa mga kadete kung saan ay hindi na nangangailangang magmartsa ang mga estudyanteng may sasakyan basta ba't ipagmamaneho nila ang kanilang mga opisyal at marami pang iba tulad ng pagpapababa sa pagkato ng mga bakla.

Ilan lamang ito sa mga kaso kaugnay sa ROTC. Ayon na rin sa ilang mga akda, pahayag, at opinyon ng iba't ibang grupo at tao ang ROTC ay lumikha lamang ng takot, karahasan at 'di matatawarang kaisipang korap sa mga kabataan. Sa mahabang panahong ito ay mandatory na ipinapatupad ay hindi nito nagampanan ang layunin nito upang ituro sa kabataan at pagka-makabayan, takot sa diyos, respeto sa kapwa at disiplina. Bagkus sa maagang panahon ay ipakita na nito sa kabataan ang kultura ng korapsyon at mga maling gawi.

Sa una pa lang ay tutol na ako sa ROTC, marami kasi silang aktibiti na hindi ko alam kung para saan--na hindi ko alam kung sa pamamagitan ba noon ay makakamit nila ang layunin nila. Nandyan ang labis labis nilang pagpapabilad sa mga kadete. Labis na pag-uutos ng mga  opisyal ng personal na utos tulad ng pagpapabili ng mga pagkain sa mga bago. Pambubugbog sa mga 'di nakakasunod. At marami pang masahol na patakaran na ayon sa kanila ay bahagi ng disiplina. Paano nga ba ang init ng araw ay makakapagpa-realize sa'yo sa pagiging makabayan at takot sa diyos? Paano nga ba ang labis kang saktan (suntukin sa tiyan) ay masasabi mong parte pa ng pagdididiplina sa'yo? Kahit nga magulang mo, hindi ka sinasaktan ng ganon tapos sila, bubugbugin ka? Gan'on ba ang makabayan, makadiyos at disiplina? Hindi ba't karahasan yun? Kayabangan sa bahagi ng mga opisyal at kahihiyan at pang-aabuso naman sa bahagi ng mga estudyante.

Isa pa sa pinakamalaking isyu na hindi maaring ihiwalay sa usapin ng ROTC (hindi gaya ng pahayag ni Anthony Taberna) ay ang usapin ng paglikha ng student intelligence network (sin) sa hanay ng mga estudyante ng ROTC. Ang mga estudyanteng kabilang sa SIN ay binigyan ng atas na maniktik sa mga lider estudante o mga aktibista. Ito ang dahilan kung bakit sa hanay mismo ng mga estudyante ay lumilikha ang ROTC ng kultura ng paghahati sa kanila. Mismong kapwa estudyante nila ay nagagawa nilang ibenta sa pamamagitan ng paniniktik (surveillance) dito. Na sa kasaysayan ay napatunayan na ang SIN ay isa mga salarin o may kinalaman sa pagkamatay o pagkadukot ng mga lider estudyante ng iba't ibang pamantsan. At ako mismo, nakaranas nito. At ROTC ang lumikha nito.

Taong 2008 ng ako ay mabigla sa mga polyetong nakita ko. Ang polyetong ito ay nagsasabing ako raw ay recruiter ng NPA sa unibersidad at sa kamaynilaan. Nakakadismaya ng malaman kong kapwa estudyante ko pa ang nagpapaskil at nagpapamahagi nito sa buong unibersidad at lugar sa kamaynilaan tulad ng Quiapo. Sila ay myembro ng Student Intelligence Network. Sila ay maaaring nabigyan na ng oryentasyon ng mga militar na ipag-isa ang mga ligal na pambansa-demokratikong organisasyon at mga komunistang grupo o armadong grupo tulad ng NPA. O sila ay maaari ding nabigyan ng gawain tulad ng pamamahagi ng mapanirang teaser na iyon bilang bahagi ng kanilang kurso sa ROTC. Nakakalungkot na kapwa ko estudyante ay ipanagkakanulo ang kaligtasan ko. Nakakalungkot na kapwa ko estudyante ay itinuturing akong kaaway. Nakakadismaya na dahil sa ROTC ay pwedeng isa na pala ako sa mga nadukot o pinaslang dahil sa mapanirang polyetong iyon. Ito ba ang pagkamakabayan? Ito ba ang takot sa diyos at disiplina?

Ito ang ilan sa mga makaysaysayang dahilan kung bakit ako at marami pang kabataan ang tumututol para sa pagpapatupad ng madatory ROTC sa mga estudyante. Ito ay makasaysayan. Hindi tulad ng sinasabi ni Anthony Taberna na panahon na para ibalik ito dahil mahalaga ito sa kasalukuyan ng hindi binabalikan ang masahol na kredibilidad ng ROTC! Ika nga ng AFP, nauubos na ang mga estudyanteng nais kumuha ng ROTC. Ang tanong bakit kaya? Ito ba ay dahil sa tumatalikod na ang kabataan para sa tungkulin nitong maging makabayan o ito ay dahil hindi na nakikita ng mga kabataan sa ROTC na sila ay matututong maglingkod sa bayan? O mas eksakto, iba na ang alam ng kabataang para gampanan ang responsibilidad nila para ipagtanggol ang kalayaan ng bayan?

ABOLISH ROTC NOW!

Pwede rin kayong maglagay ng reaksyon sa ating online forum:
Click this.